बालाजी देडगाव (प्रतिनिधी)- नेवासा तालुक्यातील तेलकुडगाव येथील माजी चेअरमन अरुणराव घाडगे यांच्या वस्तीशेजारी लावलेल्या पिंजऱ्यामध्ये आज पहाटे चार वाजता बिबट्या अडकला. या बिबट्याने या परिसरात अनेक दिवसांपासून धुमाकूळ घातला होता.
माजी चेअरमन अरुणराव घाडगे, कुंडलिक शेटे यांच्यासह परिसरातील अनेक शेतकऱ्यांच्या पाळीव प्राण्यांचा या बिबट्याने फडशा पाडला होता. त्यामुळे या परिसरात दहशत पसरली होती. या परिसरात अनेक नागरिकांनी दोन बिबटे मुक्त संचार करत असल्याचे बघितले आहे. त्यातील एक बिबट्या आज जेरबंद झाला असला तरी दुसरा बिबट्या परिसरात अजूनही फिरत असल्याने नागरिकांमध्ये भीतीचे वातावरण आहे.
बिबट्या पिंजऱ्यात अडकतात तेलकुडगाव परिसरातील नागरिकांनी बिबट्या बघण्यासाठी मोठी गर्दी केली होती. या परिसरात पुन्हा पिंजरा लावून दुसरा बिबट्याही तातडीने जेरबंद करावा, अशी मागणी नागरिकांकडून होत आहे.
