जनशक्ती, वृत्तसेवा- नेवासा तालुक्यातील खरवंडी येथून मुलीच्या महाविद्यालयीन प्रवेश प्रक्रियेसाठी नगरकडे जात असलेले खरवंडी येथील अनिल दगडू फाटके यांच्या दुचाकीचा डांबराची पिंपे घेऊन छत्रपती संभाजीनगरकडे जात असलेल्या कंटेनरशी इमामपूर घाटात भीषण अपघात झाला. या अपघातात अनिल फाटके यांचा जागीच मृत्यू झाला असून त्यांची मुलगी गंभीर जखमी झाली आहे. आज (ता.१८) सकाळी साडेदहाच्या सुमारास हा भीषण अपघात झाला. अपघाताची माहिती समजताच एमआयडीसी पोलीस ठाण्याचे पोलीस अपघातस्थळी पोहोचले. तातडीने रुग्णवाहिकेला पाचारण करुन जखमी मुलीला आणि तिच्या वडिलांना उपचारार्थ दवाखान्यात नेण्यात आलं. या अपघातादरम्यान इमामपूर घाटात वाहनांची मोठी गर्दी झाली होती. मात्र, पोलिसांनी काही वेळातच वाहतूक सुरळीत केली. या अपघाताने नेवासा तालुक्यात हळहळ व्यक्त करण्यात येत आहे.
